【轮证赢家】仲有重牛街货架放大图片

噚日下半场闷足全场咁滞,只恒指熊(55636)揸住过夜,今朝早起身都仲被美股吓一吓,事关美联储减息0.25厘,而道指一度跌逾200点,但收市就倒升几廿点,都话咗减唔减息都唔係重点,重点係个市如何去解读呢单嘢啫。

喺巴士上见到恒指做完U盘,恒指升66点,开市报26820点;踩入公司门口大约9点40分到,事关一行到返自己个位时就见到个电视已经开着,望住右下角恒指报价见红,但其实我心谂:我噚晚无熄电视?见到同事Thomas同Patrick比我更早返咗嚟,我唯有同自己讲係佢哋两个想睇电视而开架啦(其实真係唔会...)

依家9点48分,斟完杯水喺位度打紧只稿,见恒指由我返嚟时跌4X点,进一步下跌至跌8X点,开紧恒指5分钟图之际,我舅父Eric忽然send张3X年前嘅相过嚟,哈,嗰张相就係未读书但晓行晓走嘅我,好彩吓大啫,唔係都被自己吓亲;再将张相forward比我家老爷认人,佢答我呢个係我最好嘅嗰位中学同学阿贤、第二次估係我表妹阿婷、第三次再估竟然估係我同事...哼!连战友Jack都估到係我啦,等我今晚同我两个老友鸡煲完返屋企之后你就知死!

笑过一轮之后再望望电视机,搞咩已经跌过百点, reload多次个图再睇已经跌逾200点,一望就望到条SlowSTC(14,3)落到个位数嘅超卖水平,呢估时间(10点7分)将只(55636)掉走,证价做紧$0.085,对比噚日计过嘅平均买入价$0.0685,24.1%赚幅已经袋袋平安。

再睇返恒指日线图,重整一下依家发生咩事先。恒指今朝高开低收走,由升转跌,呢三日粒烛都係贴住条50天线以下运行,但今日无啦啦条10天线(26884点)升穿咗条50天线(26890点),发出咗个「黄金交叉」讯号,咁都无乜嘢嘅,港股由8月15日低位24899点一直向上行至依家26580点(10点11分mark低计)计,好歹都叫做弹咗1681点先啦,唔出返个交叉点对得住个市先得架。不过SlowSTC(14,3)个头就愈耷愈低;Click埋条保历加通道出嚟睇,保历加通道顶有下行之嫌,即暗示收窄咗大市上行嘅高度。

开埋恒指牛熊证街货图,截至10点14分止以恒指最低见过26540点计,下方第一层牛证26600至26699点全数死亡,呢度有相当于1030张期指。而26500至26599点呢度就有成819张期指嘅街货,而当中有一半死咗,之前有介绍过坊间有轮商网站有出到以50点为一层街货嘅牛熊证街货图,比大家再拆细啲去睇嘅,喺26550至26599点呢度有相当于123张期指,不过都已经死晒,变相依家最贴价其实係26500至26549点,呢度有相当于696张期指,换言之喺呢819张期指街货里头,大市依家先食得嗰15%,余下嘅85%又点会放过佢哋呢?

至于上方熊证,最贴价嘅係26900至26999点,呢度有相当于343张期指,如果现价(10点24分mark)26601点反弹299点嘅话,咁现价先至叫做行到去门口位;但如果用同样点数向下杀嘅话,即係杀落去26302点,换言之即连杀三层(嗰2点豪埋比你),都有过千张期指架。

明白见个下今朝早一下子向下冲嘅时候,相当有26500至26599点嘅牛证会出现大逃亡,但估计可能有牛证后将防守线向下移。Day Trade嘅话,恒指熊(55811),收回价26900点係市场最贴价嘅熊证,同另一只同一收回价相比嚟讲,(55811)槓桿係争啲(但都有约56倍槓桿架),不过另一只嘅街货有成23.7%,(55811)都只係1.7%。

安全啲可考虑恒指熊(55832),收回价27200点,同现价有逾500点差距,槓桿比率约35.9倍,係同一收回价中槓桿最高。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

【轮证赢家】仲有重牛街货架放大图片